Алматы облысында оқушылар соңғы қоңырау кешінен кейін түлектердің бірі сыныптасын кәуаптың шампурымен өлтіріп қойды, деп хабарлайды ALASH.KZ.
Қайғылы оқиға 24 мамырға қараған түні орын алған. 11-сынып оқушылары жиналған кеш барысында бір түлек екіншісін шампурмен ұрып өлтірген.
Марқұм қызды қорғамақ болған кезде қаза тапқан.
Бұған дейін оқиға Қаскелеңде болды делінген еді. Алайда телеарна материалында жасөспірімдер жалға алған үй Дулан ауылында орналасқаны айтылған.
Кешке тек оқушылар қатысқан – ата-аналар мен мұғалімдер болмаған. Кейбір оқушылар алкоголь ішкені белгілі болды. Алайда көз жұмған Алиби есімді бозбала ішімдік ішпеген, өзін сабырлы ұстаған. 23 мамыр күні сағат 23:00-де оның анасы хабарласып, сөйлескен.
«Қызым оған сағат 23:00-де қоңырау шалды. Немерем бөлмеде жатқанын, тамағы ауырып тұрғанын айтқан», – дейді марқұмның әжесі Айдаркүл Қадырова.
Қайғылы оқиға болған үйді кім жалдағаны және оның кімге тиесілі екені әзірге белгісіз.
Қақтығысқа қатысқан оқушылар оқыған Қырғауылды ауылындағы мектеп әкімшілігі бұл кеш туралы хабарсыз болғанын айтты.
«Соңғы қоңырау шарасынан кейін балаларды ата-аналарымен үйлеріне жібердік. Кейіннен 11-сынып оқушылары өз беттерінше жиналғаны анықталды. Бұл кеш туралы сынып жетекшісі де, мектеп басшылығы да білген жоқ. Бұған дейін ата-аналар жиналысында оқушылардың үйде болатыны туралы қолхат алынған болатын», – деді Қырғауылды ауылындағы мектеп директоры Перизат Әбдібаева.
Қазіргі уақытта кісі өлтірді деген күдікпен бір оқушы тергеу изоляторына қамалды.
Оған 15 жылға дейін бас бостандығынан айыру жазасы тағайындалуы мүмкін.
Айдаркүл Қадырованың айтуынша, күдіктінің ата-анасы Алибидің үйіне барып, кешірім сұраған.
