Таразда құқық қорғау органдарына қатысты даулы мәлімдемеден кейін Бас прокуратура арнайы комиссия құрып, Жамбыл облысына қызметтік тексеріс жүргізуге өкілдерін жіберді, деп жазады Alash.KZ.
Бас прокуратураның ресми хабарламасында көрсетілгендей, Бас прокурордың тапсырмасымен Жамбыл облысындағы жағдайды жан-жақты тексеру үшін арнайы жұмыс тобы құрылды.
Оның құрамына Бас прокуратураның Ішкі қауіпсіздік департаменті мен құрылымдық бөлімшелерінің мамандары, сондай-ақ Құқықтық статистика және арнайы есепке алу жөніндегі комитет төрағасының орынбасары кірді.
– Тексеріс барысында қызметтік заңбұзушылықтар мен қылмыстық әрекеттерге жол берілгені анықталса, кінәлілер заң аясында қатаң жауапқа тартылады, – делінген ресми мәлімдемеде.
Даулы жағдайға себеп болған мәлімдемені Құқықтық статистика және арнайы есепке алу комитетінің Жамбыл облысындағы департамент қызметкері Әлия Қожабекова әлеуметтік желіде видеоүндеу арқылы жасаған болатын. Ол тергеу жүйесіндегі заңсыздықтарды ашық айтып, әділдік сұраған.
– Мен осы жүйеде жұмыс істеймін. Бірыңғай тергеу тізілімінен деректерді жою мұнда үйреншікті тәжірибеге айналған. Жауапты тұлғалар жазаланбайды немесе тек «көзбояушылық» үшін ғана жеңіл жаза алады. Ал мен сияқты адал қызметкерлер керісінше, жүйенің құрбаны болып отырмыз, – деді ол.
Қожабекованың бұл мәлімдемесі қоғамда үлкен резонанс тудырып, әлеуметтік желілерде қызу талқыланды. Көптеген азаматтар оның ашықтығына қолдау білдіріп, мәселенің әділ зерттелуін талап етті.
Қазір арнайы топ өңірде тексеріс жүргізіп жатыр. Нақты нәтижелер мен шешімдер тек тексеріс аяқталғаннан кейін жарияланады деп күтілуде.
