"Мазмұндама" баспасының негізін қалаушысы Шыңғыс Мұқан дін мен сауатсыздық қосылса, экстремизм, терроризм қаупі туындайтынын айтты, - деп жазады Alash.KZ.
Ол Атырауда он шақты жыл бұрын болған оқиғаны еске алып, сол кезде батыс өңірі қандай қиындықпен бетпе-бет келгенін баяндады.
"Атырау облысына 2012 жылы облыс әкімінің орынбасары болып бардым. Менің жауапты салаларымның бірі дін еді. Ол кезде облыс әкімі Бақтықожа Ізмұхамбетов болды. Барған күні бір-екі аптадан кейін жарылыс болды. Құлсарыда, Жылыой ауданында. Өзімнің қарайтын салам болған соң айналысуға тура келді. Атырау - экономикалық тұрғыда маңызды аймақ. Қанша шетелдік компаниялар бар?! Мұнай құбырлары өтіп жатыр. Ондай дүние жарылатын болса, әлемдік оқиға болады, мұнай бағасына, Қазақстан экономикасына әсер етеді. Бір жыл бұрын да дәл осындай оқиға болған екен. Яғни 2011 жылы прокуратура мен ҰҚК арасында жергілікті тұрғын өзін жарып жіберген.
Ол саланы көп түсінбеген соң Қайрат Лама Шәріпке бардым, ол кезде дін істері жөніндегі агенттіктің төрағасы. Осындай жағдай, маған мықты мамандар керек дедім. Сөйтіп біраз мықты маманды Атырауға жинадық. Теологтарды, дінтанушыларды. Ол кезде сауатты дінтанушылар саусақпен санарлық. Атырауға сол тұста Еркінбек Шоқай, Ерсін Әміре, т.с.с. біраз мықты діндар жігіт барды. Күнде айналысатын шаруамыздың бірі осы болды. Түнгі сағат 12-де, құтпан намазынан кейін мешітке баратынмын. Әр теолог күніне төрт-бес кездесу өткізетін. Алыс аудандарда, ауылдарда, ол кезде мектептерде де кездесу өткізуге болатын. Түрмелерге дейін кездесу өткізіп, кешке сағат он-он бірден кейін мешітке жиналатын. Сағат он екі, бірге дейін қандай әңгіме болғанын, қандай адамдармен кездескенін талқылаймыз.
Сонда бірқатар ата-анамен мен де кездестім. Бір үйдің жалғыз баласы екен. Анасы алып келді. Үлкен коттеджде тұрады, жағдайлары бар адамдар.
"Мына балам алты айдан бері мен берген тамақты ішпейді, бізбен отырудан қалды, менің балам емес сияқты, атам десеңдер атыңдар, ұстап алып кетем десең ұстап алып түрмеге жабыңдар" деді. "Қара жамылған қызды алып келді, оның атын да білмейміз, екеуі жоғарыда өздерінің бөлмесіне кіріп кетеді, біз тамағымызды ішкен соң олар түседі, әртүрлі күмәнді адамдар келіп жатады, қорқайын дедік, жалғыз баламыз еді" деді. Баласы отыр. Сонда діни идеология санасын жаулап алады да, туған әке-шешесін талақ етіп отыр.
Осы тұрғыдан келген кезде теріс діни идеологияның құрбандары қазаққа жаны ашиды деп ойлай алмаймын. Жауыздық жасау керек пе, жарылыс жасау керек пе?! Олар соған барады", - деді ол ULYSMEDIA-ға берген сұхбатында.
Шыңғыс Мұқан мұндай жайт білім жетіспеуінен болатынын да жеткізді.
"Діндар достарым бар, бес уақыт намаз оқиды, барлық алғышартын атқарады. Мұсылмандар. Дін - қоғам үшін қажет дүние. Ізгі амалдарды насихаттайды. Соны ұстанып жүретін, адамзатқа пайда тигіземін дейтін діндар жамағат, әрине, қоғам үшін де пайдалы. Дегенмен дін мен сауатсыздық қосылса, менің ойымша, экстремизм, терроризм тудырады", - деді ол сұхбатында.
