Журналист, блогер Өркен Кенжебек Әйкерім Есенәліге берген сұхбатында отбасы туралы айтты, деп хабарлайды ALASH.KZ.
Ол үлкен қыздарға шығатын жігіттердің бұл қадамын сынап, дұрыс еместігін жеткізді.
«Жігіттердің өздерінен жасы үлкен қызға үйленіп жатқаны ұнамайды. Дайын асқа тік қасық секілді. Бәрібір тұрмыстық жағдайы, материалдық игілігі, өмірлік тәжірибесі жоғары адам ғой. Сен одан асырып ештеңе айта алмайсың. Өзіңнің әйеліңе ақыл айтпасаң, әйелді қамтитындай жағдайың болмаса, мен ондайды елестете алмаймын. Алла Пугачева мен Максим Галкин секілді 1-2 жағдайда махаббат болса, түсінемін. Қалған жағдайда осының көбеюі «маминкин сынок» секілді сепарацияның дұрыс орындалмағанының кесірі шығар деп ойлаймын. Ер балалардың да қиналмай, карьера жасамай-ақ, өзінің түрін, формасын, бойының ұзындығын, тестостеронын дейміз бе сатып, ылдым-жылдым коммуникациясын қолданып, жайлы, жұмсақ алақанға отырып алу деп қабылдаймын», — дейді ол.
Блогер жұбайы өзінен 7 жас кіші екенін айтты.
«Әйелім менен 7 жас кіші. Мені біразға дейін Өркен аға деп келді. Сосын өзі ұялып қойды. Ол менің блогымның оқырманы болған. Маған 2011 жылы өзі жазған. Менің қатты жүрегіме тигені де сол болды. Жәй ғана мені еркек, асыраушы деп емес, өнерімді, шығармашылығымды бағалағаны өте тамаша ғой. Мен де ол әйелді алып жатқан кезде барлық артықшылығы мен кемшілігін саралап, қандай әйел алып жатқанымды ақылға салдым. Махаббат, тезірек алу керек деген дүние болмады. Менің ойымша солай болу керек», — дейді ол.
