Маңғыстау облысы полиция департаментінің баспасөз қызметі бір топ ер адамның жанжалынан кейін қаза тапқан жігіт туралы тың ақпарат берді, деп хабарлайды ALASH.KZ.
Жергілікті тұрғындардың айтуынша, оқиға 28 сәуір күні болған. Жанжал кезінде ер адам қаза тапқан. Әлеуметтік желілерде тараған бейнежазбадан кейін оқиға орнына құқық қорғау органдары келіп жеткен.
Lada.kz тілшісі Маңғыстау облысы полиция департаментіне ресми түсініктеме алу үшін жүгінді.
Ведомствоның мәліметінше, адам өліміне себепші болды деген күдікпен бір адам ұсталып, уақытша ұстау изоляторына қамалған.
Аталған факті бойынша қылмыстық іс қозғалды.
Қазіргі уақытта тергеу амалдары жүргізіліп жатыр, басқа ақпарат тергеу мүддесіне байланысты жария етілмейді.
Айта кетейік, 26-шағын аудан тұрғындары №19 үйдің артындағы аумақта көктем келгеннен бері қаңғыбастар мен алкогольдік ішімдікке әуес адамдар жиі жиналатынын айтқан.
Олардың сөзінше, арақ-шарапты жақын маңдағы дүкеннен сатып алып, кейін сол жерде даурығып, шу шығарып отырады.
Тұрғындар билік өкілдерінен қоғамдық қауіпсіздікті қамтамасыз етіп, маргиналды элементтер жиналатын бұл қауіпті орынды ретке келтіруді сұрайды.
Бұған дейін Ақтауда көпқабатты үйден құлап кеткен ер адамның қайтыс болғаны хабарланған еді.
