TikTok желісінде орамалды ару өзінің намысы тапталғаны туралы баяндады. «Жайдарман» әзіл-сықақ кешінде өзінің орамалы үшін бірінші қатарға отыруға рұқсат етілмегенін айтты, деп хабарлайды ALASH.KZ.
Ұлттық арналардың өзінің арнайы заңы бар екенін де атап өтті.
«Бүгін Жайдарман Ұлттық лигасын көруге бардым.
Орным — төрешілердің артындағы 1-қатар.Алдын ала келіп, өз орнымда отырдым. Қасымда құрбымды күтіп отырғанмын. Бір оператор келіп:
– Алдыңғы бос орынға өтсеңіз, — деді.
Мен:
– Жоқ, менің алған орным осы. Өз орнымда отырамын, — деп жауап бердім.Сәлден соң екінші оператор келді:
– Қазір “Хабар” арнасына түсірілім басталады. Қызыл киіммен отыруға болмайды, — деді.
Мен:
– Қызыл орамалдың не қатысы бар? — деп сұрадым.
– Қарындас, анау бос орынға барып отырсаңызшы, оператор айтып жатыр, — деді тағы.
Мен тағы да:
– Менің орным осы. Өз орнымнан тұрмаймын, — дедім.Кейін тағы бір оператор келіп:
– Басталуға аз қалды, төрешілер келе жатыр. Өтініш, басқа орынға өтсеңіз.
Мен:
– Бұл орамал үшін бе?
Ол:
– Иә. Бірінші қатарда орамалмен отыруға болмайды. Бізге солай тапсырма берілді, — деді.
Мен:
– Онда басшыңызды шақырыңыз, — дедім.Жайдарман біткенше орнымда отырдым. Кейін жағдайдың анық-қанығын білу үшін түсірілімге жауапты адамды іздедім. Жанасыл Болатбек мырзадан сұрадым. Менің құқығым шектеліп жатыр, не себепті деп. Ол:
– Бұл басшылықтың тапсырмасы. Барлық телеарна талаптары солай. Жазылатын заңдар бар . Жазылмайтын заңдар бар. Солай енді…, – деді @zhanasil», — деп жазды ол.
Оқиғаға Есен Елеукеннің жауап беруін талап етті.
«Құрметті Есен Елеукен мырза! @jaidarman_production @galym_makhambetov
Осы жағдайға қандай пікір айтасыз?
Орамал таққан қыздардың Жайдарман көруіне, 1-қатарда отыруына тыйым салынғаны — қандай заңмен реттеледі?
Егер бұл шарт болса, неге билет сатуда ескертілмейді?
“1-қатарда орамал таққан қыздарға орын берілмейді” деген тәртіп қайда жазылған?!Қазақстан телеарналарында орамалмен түсуге тыйым салынатыны, мұсылман әйелдердің жиі шеттетілетіні — ашық құқық бұзушылық», — деді ол.
Аталмыш видеоны осы сілтемеден көре аласыз.
