Путинге жер дауы бойынша өтініш жасаған қазақстандық келіншек туралы тың ақпарат шықты. Құқық қорғаушылардың мәліметінше, сотталған Жансұлу Дархамбаева жүктіліктің 9-шы айында, деп хабарлайды ALASH.KZ Ulysmedia.kz сайтына сілтеп.
Толығырақ
Солтүстік Қазақстан облысында мамыр айының соңында Жансұлу Дархамбаеваға қатысты резонансты іс бойынша үкім шығарылған.
Бұған дейін әлеуметтік желілерде әйел адамның Ресей президенті Владимир Путинге “жер дауы” жөнінде үндеу жасап, “ежелгі қазақ жерлері” туралы пікір білдіргені хабарланған болатын.
Осы іс бойынша ол ҚР ҚК 174-бабы 1-бөлігі («Әлеуметтік, ұлттық, рулық, нәсілдік, таптық немесе діни араздықты қоздыру») бойынша 2 жылға бас бостандығынан айырылды.
Құқық қорғаушылар не дейді?
Құқық қорғаушылардың айтуынша, Жансұлу Дархамбаева жүктіліктің 9-айында. Түрмеде оның денсаулығы күрт нашарлап, ауруханаға жатқызылған. Қазір ол Петропавл қаласында конвой күзетінде жатыр, оған ешкім кіргізілмейді. Жақын туыстары жолға шыққаны хабарланды.
Құқық қорғаушылар дабыл қағуда:
«Әйел адам өте қиын жағдайда босануға мәжбүр болады. Кесар тілігі 10 маусымға белгіленген», — дейді олар.
Ашық үндеу
Қазақстандағы халықаралық келісімдер жөніндегі қоғамдық мониторинг орталығының директоры Галина Моисеенко СҚО прокуроры Қайрат Абдыхановқа ашық хат жолдады. Онда былай делінген:
«Бұл істі гуманитарлық және құқықтық тұрғыдан қарастыру қажет.
- Бала мүддесін қамтамасыз ету принципі бұзылып отыр;
- ҚР ҚК 74-бабын (жазаны кейінге қалдыру) қолдануға негіз бар;
- Әйелдерге қатысты адамгершілікпен қарауға бағытталған халықаралық стандарттар сақталмаған;
- Жаза шамадан тыс және пропорционал емес қолданылған.
Сіздің бұл іске принципті және заңға сай баға беретініңізге, сондай-ақ Қазақстанның әйелдер мен балалардың құқықтарын қорғауға қатысты халықаралық міндеттемелеріне сәйкес әрекет ететініңізге үміт артамын», – деді Моисеенко.
