Абай облысы Үржар ауданының Бестерек ауылында орын алған жол апатынан зардап шеккен балалардың жағдайына қатысты Денсаулық сақтау министрлігі ақпарат таратты, деп хабарлайды Alash.kz.
Ведомство мәліметінше, облыстық және республикалық деңгейдегі дәрігерлерден құралған мультидисциплинарлық топ зардап шеккендерді толық тексеріп, жағдайын бағалап, шұғыл емдеу жоспарын әзірлеген.
"Стационарда зардап шеккен үш бала бар, олардың біреуінің жағдайы өте ауыр, қалған екеуінің жағдайы тұрақты ауыр деп бағаланған. Пациенттер жағдайының ауырлығы алынған жарақаттарға байланысты. Балаларда бассүйек-ми жарақаттары, тірек-қимыл аппараты мен ішкі ағзалардың жарақаттары диагнозы қойылған", - дедінген хабарламада.
Министрлік мәліметінше, бір науқасқа дәрігерлер миға күрделі нейрохирургиялық операция жасап жатыр, сонымен қатар ішкі ағзалардағы қан кету тоқтатылған. Жағдайы тұрақталған соң балаларды Астанаға әуе көлігімен жеткізу қарастырылып отыр.
19 тамызда Бестерек ауылында Toyota маркалы автокөлікті тізгіндеген 55 жастағы жүргізуші үй қақпасының жанында ойнап тұрған балаларды қағып кеткен. Нәтижесінде екі бала оқиға орнында, тағы бірі ауруханаға барар жолда көз жұмды. Үш кәмелетке толмаған бала түрлі жарақатпен ауруханаға түсті.
Жүргізуші ұсталып, уақытша ұстау изоляторына қамалды. Сараптама оның мас болмағанын көрсетті. Қазір қылмыстық іс қозғалып, оқиғаның мән-жайын анықтау үшін тергеу шаралары жүргізіліп жатыр.
