Қазақстандық теннисші Елена Рыбакина (WTA рейтингінде 10-орын) АҚШ-тың Цинциннати қаласында өтіп жатқан WTA 1000 сериялы турнирінің ширек финалында Беларусь спортшысы Арина Соболенкоға (әлемдік рейтингте 1-орын) қарсы кездесті, деп хабарлайды ALASH.KZ Sports.kz-ке сілтеме жасап.
Рыбакина күтпеген жерден әлемнің бірінші ракеткасын екі сетте — 6:1, 6:4 есебімен жеңіп, жартылай финалға шықты. Айта кетейік, бұл ойында фаворит деп Соболенко саналған еді.
Осылайша, Елена Рыбакина жартылай финалда Польшадан келген әлемнің үшінші ракеткасы Ига Швёнтекпен кездеседі. Бұл матч 17-нен 18 тамызға қараған түні, Қазақстан уақытымен сағат 23:00-де өтеді.
Бұған дейін турнир барысында Елена Рыбакина мексикалық теннисші Рената Сарасуаны (70-орын), бельгиялық Элизе Мертенсті (22-орын) және америкалық Мэдисон Кизді (6-орын) жеңген болатын.
Айта кетсек, Цинциннати турнирінің жүлде қоры 5 152 599 долларды құрайды. Жеңімпаз 752 275 доллар және 1000 рейтингілік ұпай иеленеді.
