Дзюдодан Қазақстан ерлер және әйелдер құрамаларымен жаңа жаттықтырушылар жұмыс істей бастады, деп жазады Alash.KZ.
22 сәуірде Caravan.kz порталына сұхбат берген Қазақстан ұлттық құрамасының дзюдодан кеңесші-жаттықтырушысы Роберт Мшвидобадзе командамен жұмысты қалай бастағаны және құрамдағы өзгерістер туралы айтып берді.
2025 жылдан бастап жаңа бапкерлік штабпен жұмыс істеп жатқан Қазақстан құрамасы 25–28 сәуір аралығында Таиланд астанасы Бангкокта өтетін Азия чемпионатына қатысады. Бұл біріншілікке қатысатын ерлер құрамасы едәуір жаңартылған. Көпшілікке таныс есімдер жоқтың қасы. Әйелдер құрамасында болса, Галия Тынбаева мен Эсмигүл Куюлова есімдері сәл де болса таныс.
Роберт Мшвидобадзенің айтуынша, мұндай күрделі құрамдық ротация әдейі жасалған.
«Ерлер құрамасынан өткен жылы Азия чемпионатында күрескен бірде-бір спортшы биыл бұл турнирге қатыспайды. Қазір бізде өте жас әрі болашағы зор команда бар. Бұл циклде әлемнің көптеген құрамаларында ұрпақ алмасуы жүріп жатыр, Қазақстанда да солай. Біздің басты мақсат – Азия чемпионаты немесе әлем чемпионаты емес, біз Олимпиада-2028 және 2026 жылғы Азия ойындарына дайындалып жатырмыз. Қалған жарыстарды біз жаттығу процесінің бір бөлігі ретінде қарастырамыз», – деді кеңесші-жаттықтырушы.
Мшвидобадзе қазіргі таңда ерлер мен әйелдер құрамаларының жалпы дене дайындығын арттыру кезеңінен өтіп жатқанын айтты.
«Бізде жаңа жаттығу жүйесі енгізілді, бұл спортшылар үшін сәл қиын болып жатыр. Себебі олар бұрын мұндай күш түсіретін ОФП (жалпы физикалық дайындық) жаттығуларын көп жасамаған. Бірақ бұл – қалыпты жағдай. Біз алғашқы оқу-жаттығу жиынында бұның боларын ескерттік. Жаңа жүйеге үйреніп, нәтиже көрсету үшін кемінде бір-екі жыл керек», – деді ол.
Азия чемпионатына қатыспайтын ұлттық құраманың көшбасшылары уақыт өте татамиге оралады. Олардың қатарында Олимпиада чемпионы Елдос Сметов те бар.
«Елдос Сметов әзірше бізбен жаттығуға кіріскен жоқ. Себебі Олимпиададан кейін ол аздаған жарақаттар алған еді, қазір соларды емдеп жатыр. Жақын арада бізге қосылады деп үміттенемін. Елдос Сметов – тек Қазақстан емес, әлемдік спорттың жұлдызы. Оның қайта келуі біздің жастарға үлкен мотивация болады. Қалған көшбасшылар да өте еңбекқор, олардың спортқа деген аштығы мені таң қалдырды. Барлығы барын салып жаттығып жатыр, жақында олар керемет белдесулер көрсетіп, көп медаль әкелетініне сенімдімін», – деді Мшвидобадзе.
Айта кетейік, Астанада өткен ашық жаттығу кезінде Роберт Мшвидобадзе Сметовтан бөлек келешегі зор спортшылар ретінде келесі есімдерді атап өтті:
– Максим Меирлан (90 кг),
– Нұрлыхан Шархан (100 кг),
– Абылайхан Жұбаназар (81 кг),
– Әбиба Әбужақынова (48 кг).
