Түркістан облысының жалғызбасты анасы өзін күштеп Шымкенттегі психологиялық көмек орталығына апарғанын мәлімдеді, деп хабарлайды ALASH.KZ.
Tengrinews.kz тілшісінің хабарлауынша, Түркістан облысында тұратын жалғызбасты ана үш белгісіз ер адамның балалардың көзінше үйіне баса-көктеп кіріп, өзін күштеп Шымкент қаласындағы Komek Center психологиялық көмек көрсету орталығына алып кеткенін айтты.
Әйелдің айтуынша, орталықта оны ешқандай медициналық не заңды негізсіз ұстап, қол-аяғын байлап, белгісіз препараттар егіп, есінен тануға дейін жеткізген. Сонымен қатар, қандай да бір құжаттарға қол қоюға мәжбүрлеген.
«Мен қол қоюдан бас тартқан сайын маған белгісіз дәрілер егіп, есімді жоғалтуға дейін апаратын. Қолым мен аяғымды скотчпен байлап тастайтын. Тек туыстарыммен байланысқа шыққаннан кейін ғана ол жерден шығуға мүмкіндік алдым.
Орталықта болған кезімде өз көзіммен кәмелетке толмаған қыздар мен ұл балаларды қорқытып, ешқандай көмек көрсетпей ұстап отырғандарын көрдім», – деді келіншек.
Бұл оқиға әлеуметтік желілерде үлкен резонанс тудырды. Жәбірленуші Қазақстан Президентіне ашық бейнеүндеу жасап, көмек сұрады.
Полиция департаменті бұл жайтқа байланысты қылмыстық іс қозғалғанын хабарлады. Қазіргі уақытта тергеу жүріп жатыр.
«Орталықтың қызметі тексерілуде. Құжаттар, бейнежазбалар, екі тараптың да уәждері зерделеніп жатыр. Тергеу заң аясында жүргізіледі. Біз барлық фактілер бойынша әділ әрі жан-жақты тексеру жүргіземіз», – деп түсіндірді полиция өкілдері.
