Жолаушылар мінген қоғамдық көлік бес автокөлікті қақты. Жол апатының салдарынан алты адам зардап шекті, деп хабарлайды Alash.KZ.
Оқиғаға қатысты видео әлеуметтік желіде жарияланды. Куәгердің айтуына қарағанда, №33 бағытында жүретін автобус жолындағы барлық көліктерді соғып, жолаушыларды жарақаттаған.
Жол апаты Сейфуллин даңғылында болған.
Құқық қорғау органдары жекеменшік Yutong маркалы автобустың жүргізушісі тізгінге ие бола алмай қалғанын мәлімдеді. Ол Сейфуллин даңғылымен солтүстік бағытта келе жатып, Кассин көшесімен қиылыста қарсы қозғалыс жолағына шығып кеткен.
«Сол жерде ол бағдаршамның тыйым салатын сигналына тоқтаған бес көлікпен соқтығысқан. Олар – Hyundai Tucson, Hyundai Accent, Lexus, Mitsubishi Outlander және Chevrolet Cobalt көліктері», – деп хабарлады Алматы қалалық Полиция департаментінің баспасөз қызметі.
Жол апаты салдарынан алты адам зардап шекті. Олардың барлығы медициналық көмекке жүгінген. Аталған жол-көлік оқиғасы бойынша Түрксіб аудандық полиция басқармасы тергеу жүргізіп жатыр.
