Атырау облысы, Сағыз ауылында қарулы шабуыл орын алып, үш адам оқ жарақатын алды. Бұл оқиға 27 мамыр күні болғанын облыстық Полиция департаментінің баспасөз қызметі хабарлады, деп жазады Alash.KZ.
«Мой Город» басылымы жазғандай, алдын ала мәлімет бойынша, белгісіз біреу Subaru Outback көлігіне оқ атқан. Көлікте үш жергілікті тұрғын болған, олардың барлығы әртүрлі дене жарақатын алған.
Полиция департаменті бұл оқиға бойынша Қылмыстық кодекстің "Кісі өлтіруге оқталу" бабымен қылмыстық іс қозғалғанын нақтылады. Қазір оқиғаның мән-жайы анықталып, сотқа дейінгі тергеу жұмыстары жүргізілуде. Сондай-ақ күдіктілерді іздеу және ұстау бойынша шаралар қабылдануда. Тергеу барысы басшылықтың бақылауында.
Облыстық денсаулық сақтау басқармасы зардап шеккендердің оқиға болған күні аудандық ауруханаға жеткізілгенін растады. Олардың бірі ауыр хәлде болғандықтан, санитарлық авиациямен Атырау облыстық ауруханасына шұғыл жеткізілді.
Науқастарға дер кезінде алғашқы медициналық көмек көрсетілді. Шокқа қарсы және қан тоқтату терапиясы, ауырсынуды басу және оттегімен инфузиялық ем жүргізілді.
Тергеу жалғасуда.
