Әлеуметтік желіде жаназа шығару кезінде келеңсіз жағдай орын алғаны туралы ақпарат тарады, деп хабарлайды ALASH.KZ.
Бұл туралы “Жалобы Павлодар” инстаграм аккаунтында жарияланды.
Қаралы отбасының жанайқайы: жаназа рәсіміне байланысты мәселелер кімнің бақылауында?
Сәлеметсіздер ме. Өкінішке қарай, біз ауыр жағдайға тап болдық — бізге өте жақын адамымыз өмірден өтті, отбасымыз қара жамылды. Осы ретте жаназа рәсімін өткізу үшін Ақ мешітке барып, имамдарға жүгіндік. Алайда, күтпеген әрі өте жағымсыз жағдайға тап болдық.
Бұл бизнес пе әлде…?
Жаназа рәсімін ұйымдастыру кезінде біз біртұтас қызмет көрсету бизнесімен бетпе-бет келдік. Әрбір әрекетке арнайы белгіленген «тариф» қойылыпты: молданың қызметі үшін бөлек ақы алынады, Құран оқыған әр сүреден кейін тағы қосымша сома сұралады. Бұған қоса, басқа да ұсынылатын қызметтер «қосымша төлеммен» ұсынылады.
Біздің сұрағымыз: мұндай діни қызметтер мен төлемдер кімнің бақылауында?
Егер бәрі ресми баға прейскуранты бойынша жүрсе, неге чек берілмейді? Бұл сұрақ біз сияқты қаралы жандар үшін өте маңызды. Өйткені қара жамылған шаңырақта артық дау мен түсініспеушілікке орын болмауы тиіс.
Ата-баба дәстүрі дінге қайшы ма?
Сонымен қатар, жаназа рәсімінде сархыт дайындап, келген қонақтарға таратқымыз келді. Алайда молда: «сархытты алсаңдар, үйлеріңе қайғы еріп барады» деп, халықты үркітті. Мұны естіген жұрт шошып, ешкім ештеңе алмады. Осылайша, ата-баба дәстүрімізге қайшы келіп, сарқыт тарату дәстүрі бұзылды. Адамдар үйге ештеңе алып кетуге ұялып, ыңғайсыз жағдайда қалды. Мұндай жағдайлар ел ішінде жиілеп бара жатса, бұл мәселе назардан тыс қалмауы тиіс. Дін қызметкерлері мен мешіттердегі қызмет көрсету жүйесі ашық әрі әділ болуы керек деп есептейміз”,- деп жазды оқырман.
