АҚШ президенті Дональд Трамп Ресей мен Украина арасындағы соғысты бейбіт жолмен реттеу жоспарының мазмұнын «алдағы үш күн ішінде» жарияламақ, деп жазады ALASH.KZ New York Post сайтына сілтеп.
Бұл жоспарға Еуропа елдерімен қатар Ресей, Украина және НАТО-ға кірмейтін мемлекеттен келетін бітімгерлік контингентінің қатысуы қарастырылған.
NYP басылымына сұхбат берген Ақ үйдің жоғары лауазымды өкілі бұл жоспар атысты тоқтату туралы келісімге қол жеткізілген жағдайда, Еуропа елдерінің әскерін Украина территориясына орналастыру арқылы бітім талаптарының орындалуын қамтамасыз етуді көздейтінін айтты.
«Ең күрделі мәселе – қауіпсіздік күштері қалай көрінуі керек деген сұрақ. Біз оларды ‘тұрақтылықты қамтамасыз ететін күштер’ деп атаймыз. Бұл – украиндар қауіпсіздік кепілдігі ретінде алғысы келетін тетіктердің бірі, және біз олардың бұл кепілдікті алатынына үміттенеміз», – деді шенеунік.
Сонымен қатар, жоспар авторлары атысты тоқтату шарттарының сақталуын бақылау үшін тағы бір бітімгерлік күш құрылуы мүмкін екенін жоққа шығармайды.
Мұндай «бірлескен комиссияның» құрамына ресейліктер, украиндар және НАТО-ға кірмейтін үшінші ел өкілдері енуі мүмкін.
АҚШ бұл үдеріс барысында тек «қаржылық күш» ретінде, яғни әскери емес, тек қаржылай қатысуы мүмкін, деп атап өтті америкалық әкімшіліктің өкілі. NYP басылымы бұл жоспардың егжей-тегжейі әлі нақты бекітілмегенін жазады.
18 сәуір, жұма күні Трамп әкімшілігінің жоғары лауазымды өкілі NYP-ке берген сұхбатында, АҚШ делегациясымен соңғы келіссөздер кезінде украиналық өкілдер ең алдымен келісімнің «аумақтық» бөлігіне алаңдаушылық білдіргенін айтты.
Оның айтуынша, Киев «де-факто» деп танылатын жағдайда өз жерінің 20 пайызынан бас тартуға дайын сияқты көрінеді.
«‘Де-факто’ дегеніміз – біз ресейліктер бұл жерді бақылап отырғанын мойындаймыз, бірақ бұл жер Украинаға енді қайтып берілмейді деп айтпаймыз. Ал ‘де-юре’ – бұл біз ресейліктердің бұл жерді иеленіп отырғанын заң жүзінде мойындаймыз, және бұл жерді ешқашан қайтып алмаймыз дегенді білдіреді», – деді америкалық шенеунік.
Бұған дейін Wall Street Journal басылымы Батыс елдерінің шенеуніктеріне сілтеме жасап, Трамп әкімшілігі Киевке Қырымды Ресей жері ретінде тануды және НАТО-ға кіруден бас тартуды ұсынғанын жазған.
Сондай-ақ, тараптар Запорожье АЭС маңында АҚШ бақылауындағы бейтарап аймақ құру мүмкіндігін де талқылауда.
20 сәуір, жексенбі күні Дональд Трамп Ресей мен Украина соғыс қимылдарын тоқтатқан жағдайда, екі елмен де жұмыс істеуге дайын екенін мәлімдеді.
«Үміттенемін, Ресей мен Украина осы аптада келісімге келеді. Бұдан кейін екі ел де АҚШ-пен үлкен бизнес жасап, табыс таба бастайды!», – деп жазды АҚШ президенті Truth Social әлеуметтік желісінде.
