Алаяққа алданған 200 адамның кредиті кешірілді. Бұл туралы “Qasqa Jol” You tube арнасындағы подкастта айтылды. Сұхбат барысында ҚР Парламенті Мәжілісінің депутаты Үнзила Шапақ, және алаяққа алданған Анарбек Марқабай өз оқиғаларын айтып, халыққа кеңес берді, деп хабарлайды ALASH.KZ.
Қазіргі таңда Қазақстанның әр тұрғынының ұялы телефонына алаяқтар қоңырау шалып, өз арам ісін жүзеге асыра алады. Олар адамның іші бауырына кіріп, шатастырып, ақыры несие алғызады.
Алаяқтың құраны болған Анарбек Марқабай өзінің қалай алданғанын айтып берді.
”Өзім ылғи жұмыста жұмысшыларға “сақ болыңдар, алаяқтар көп қазір” деп айтып жүретін едім. Таңертең бір номер хабарласты. Іштей алаяқ па деп ойлап, күдіктендім. Сосын “қауіпсіздік қызметіненбіз, сіздің счетіңізден кредит алмақшы” деп тағы біреу хабарласты. Оның артынан, “сізге қауіп төніп тұр, осы қосымшаны жүктеңіз, біз банк счетіңізді тексеріп, бұғаттаймыз” тағы қоңырау шалды. Мені шатастырып тұр ғой, сенімге кіріп тұр. Сосын мақұл деп қосымшаны жүктедім. Ал ол қосымша, менің телефоныма енгеннен кейін, барлық банкке доступ ашылып кетеді екен. Ішім бірдеңенің дұрыс емес екенін сезіп тұрды. 2 күннен кейін қарасам, 5 банктен 7 кредит алынған. Өзім екі күн бұрын Халық банкке барып, өзіме несие рәсімдей алмай қойғанмын. Қырсық шалып, алаяқтар ісін жүзеге асырды”,- деді ол өз оқиғасын баяндай келе.
