Айтыскер ақын Мұхамеджан Тазабек Нұрсұлтан Назарбаевтың туған күнінде желіде жазба жариялап, ел естімеген естелігін бөлісті, деп жазады Alash.kz ұлттық порталы.
“Бүгін “Астана күні” “Домбыра мерекесімен” сәйкес кеп жатыр. Әрі Тұңғыш президенттің 85 ке келген мерейтойы да межесіне келіп тұр екен…
Үш құндылықтың басы біріккен бір жазбаммен бөлісейін.
Астананы салған атқамінерлермен Елбасының мерейлі күнінде қолыма домбыра алып бір жырлағаным бар еді…Бұл оқиға 2010 жылы, шілденің басында Елбасы резиденциясында орын алған еді. Қолыма домбыра алғанға дейін де, домбырадан кейін де біраз әңгіме бар. Оны толықтай оқығысы келген кісі “Енді айтуға болады” кітабын парақтап шықса болады. Мынау сол отырыстың бір сәті болатын…
“Жағымпаздық па, жанашырлық па?
Астарлап айтылған арнау…Отырыстағы ресми әңгіме саябырси бергенде қолыма домбыра алдым. Қағып жібергенде бәрі елең ете қалды.
Елбасы: ”Ал, сен ең бастысы айтыскер ақынсың ғой, кинода Жамбыл атаңның да ролін сомдадың. Қане, суырып сап, мына ағаларыңа бірдеңе деші” деп, мені қамшылай сөйледі…Қарасам қарсы алдымда сол кездегі мам.хатшы Қанат Саудабаев отыр екен.
Мен:
”Нұр, аға, мына отырған Қанат ағам,
Қанат деп, атын қалай дәл атаған.
Қанат боп, оң-солыңнан көтермелеп,
Осындай ұлдар жүрсін әр атадан!”“Қанекең епті туған ер іспетті,
Бұл жолда мықтыларға беріспепті!
Ширек ғасыр шауып жүр қасыңызда,
Тұлға екен шаршатпайтын тонус текті.
Өзін көрсем сұрайын деп жүр едім,
Қанеке атағыңыз алыс кетті.
АҚШ қа елші болып барған кезде,
Қызығың көп, жасардай конспекті.
Кондолиза Райспен кездескенде,
Тың әсер қалдыратын шанс бопты.
“My sister” деп алдынан билеп шығып,
Таң қалып, солай сізбен таныс бопты.
Айтпақшы, айтыңызшы, біз де естідік,
АҚШта қазақ үшін сан іс бопты.
Қалайша охотаға ап шықтыңыз,
Қорғаныс министрі Рамсфелдті?!”-деп, ол күтпеген, бірақ өзім білетін ерекше қырынан жырға қосып жіберіп, Қанекең қуанғанған орынан тұрып кетті.“Нұреке, Сіз тапсырсаңыз болды ғой, ел үшін, мемлекет үшін жыртып өтем ғой” деп өзіне тән ақ көңілдікпен,
(бір кезде мәдениет министрі болған)
әртістігі ұстап, арқасы қозып кетті ме, түймелерін бырт-бырт етіп үзіп, көйлегінің жағасын екі қолмен ұстап, екі жаққа қақ айырды…Талай жерде тауып айттық қой, бірақ, сөздің соңы дәл мынадай эффектіге ұласпаған екен. Қуанарымды да, қуанбасымды білмей қалдым. Елбасы да аңтарылып, не толқығаны, не шалқығаны белгісіз, әлгі “берілгендікке” сенді ме, сенбеді ме, ол да белгісіз, басын шайқап, көзін ойнақшыта Қанекеңе қарап қалды…
Төрт-бес сәтті шумақтан кейін Аслан Мусинге қарай бұрылдым. “Маған не айтар екен” дегендей, сынай қарап, сығалай күліп отыр екен.
“Асекең өзіңізге бел баладай,
Ел басқарып жүр бүгін ер данадай!
Басшысына қосшы боп берілмесе,
Биікке орнығады пенде қалай?
Асеке, сіз жайында бір әңгіме,
Естідім, рас па екен, беу, ғалам-ай!
Елбасы Ақтөбеге келген кезде,
Ат мініп шығыпсыздар белге қарай?
Зуылдап, шапқан кезде Нұр ағаның,
Тұлпары сүрінген бе, әлде қалай?
Ер ауып, тартпа үзіліп, тақым босап,
Құлауға бет алыпты оңға қарай…
Сол кезде ат үстінен сіз секіріп,
Жанталаса құлапсыз жерге қарай.
Елбасыны тигізбей топыраққа,
Құшақтап, ап қалыпсыз кең даладай.
Естідім осындай бір әңгімені,
Мұндай сөз тарқамасын елге қалай?!
Басшының қатеріне басын тіккен,
Болдыңыз жартастағы өр қарағай!
Нұр ағаң қадіріңді біліп, сосын:
“Аман жүр, деген шығар, сен де, давай!”Осындай шумақтардан бес-алтауын төгіп-төгіп жіберіп ем, Асекең ағамның жүзі жібіп, жүрегі жұмсарып сала берді. Суретке түсуден қашқақтайтын
“серый кардинал” оң жағымызға кеп, ортамыздан орын алды.
Сөзге тоқтаған халықпыз ғой. Одан кейін Аслан Мусиннің де, Қанат ағаның да тек қана ағалығын көрдік. “Бет көрсе жүз ұялады” дейді ғой. Бетпе-бет сөйлесіп, ашық әңгімемен ақтарылып алғанға не жетсін?!
Сол кешті ойлана жүріп орайластырып, белден баспай, жүздестіріп отырып жүзеге асырып жіберген Елбасының да бір даналығы шығар?!Қанша дегенмен көпті көрген, әлемдік алпауыттармен арбасып, отбасының да отына шыжғырылып, тау асып, тас басқан күрделі тұлға ғой. Оның көргенін көрмегесін, оның жолымен жүрмегесін, оның етігін кимегесін аузымыз жылдам айта береміз. Алла артық сөздеріміз үшін біздерді кешірсін!
(“Енді айтуға болады” кітабынан үзінді)Ет пен тырнақтай бөлінбейтін құндылықтар болады. Нұр аға тәуелсіз Қазақстан үшін сондай тұлға. Кеткен келер, кеміс толар. Су ағар, тас қалар. Баран дегеніміз қылаң боп шығар, шындық дегеніміз күмән боп шығар. Не болмай жатыр?! Неге таң қалмадық?!Тарих таразысы әділ!
Әркімді өз сатысына қояр…Президентіміз Тоқаевтың ынсаппен айтқан құттықтау хаты - алтын ортасы, әділ бағасы.
Астана ажарланып, Ел ағалары дін аман боп, бейбіт күніміз домбыра күмбірімен салтанатқа бөлене берсін!”, - деп жазды Мұхамеджан Тазабек.
