Сауд Арабиясының ханзадасы Аль-Валид ибн Халед ибн Таляль әл-Сауд ұзаққа созылған 20 жылдық комадан кейін 36 жасында қайтыс болды.
Бұл туралы оның әкесі, ханзада Халед ибн Таляль әлеуметтік желі арқылы хабарлады, деп жазады Alash.kz ұлттық порталы.
«Алланың қалауымен балам Уалид ибн Халед ибн Таляль әл-Саудпен қоштастым. Жаратқан рақымына алсын», – деп жазды ол өзінің парақшасында.
Аль-Валидтің комаға түсуіне 2005 жылы Лондонда орын алған жол апаты себеп болған.
Ол кезде небәрі 16 жаста болған ханзада ауыр ми жарақатын алып, сол күннен бастап ес-түссіз күйге түскен.
Содан бері ол Эр-Риядтағы клиникалардың бірінде жасанды тыныс алу аппаратына қосылып жатты. Медициналық қорытындылар оның ми қызметі қалпына келмейтінін көрсеткенімен, отбасы аппаратты өшіруден бас тартқан.
Әкесі баласының тіршілігін сақтап қалуға барынша тырысып, Алла тағаланың еркімен бір күні оянарына сенген.
Аль-Валидтің аты алғаш рет 2019 жылы әлеуметтік желілерде кеңінен тарады. Сол жылы медбике оған сөйлеген кезде қолын сәл қозғаған видеосы жұртшылықтың назарын аудартқан еді.
Көпшілік оны есін жия бастады деп болжағанымен, дәрігерлер бұл әрекетті рефлекстік қимыл ретінде түсіндірді. Арада бірнеше жыл өткен соң, биыл маусым айында тағы бір үміт оты тұтанып, ханзаданың көзін ашып, сыртқы дыбыстарға реакция білдіргені жөнінде хабар тарады. Алайда бұл ақпарат ресми түрде расталмады.
Аль-Валид – Сауд Арабиясының ықпалды әулеттерінің бірінен шыққан. Оның әкесі – ханзада Халед ибн Таляль – белгілі меценат әрі саяси тұлға.
Әлеуметтік желілерде Аль-Валидтің өмірі жылдар бойы жұртшылықтың назарында болды. Көпшілік оның жағдайын үнемі бақылап, сауығып кетуіне тілектестік білдіріп отырды.
Алайда 20 жыл бойы үнсіз жатқан ханзаданың тағдыры, ақыры, қайғылы аяқталды.
