БАНГКОК — Танымал тай актері Джеймс Руангсак Лойчусак 27 жыл бұрын ұшақ апатынан аман қалған. Жуырда ғана Үндістанда болған ұшақ апатынан тірі қалған жалғыз жолаушының өзі секілді сол кезде 11А орнында отырғанын білген актер қатты таңғалысын білдірді. Бұл ерекше сәйкестік жұртты таңғалдырды және әлеуметтік желілерде қызу талқылануда, деп хабарлайды ALASH.KZ.
Air India әуе компаниясының ұшағы Гуджарат штатының Ахмадабад қаласында апатқа ұшырағанда бортта 241 адам болған. Олардың ішінен тек бір адам ғана тірі қалған. Бұл туралы естіген Джеймс Руангсак өзінің әлеуметтік желідегі парақшасында:
«Терім үрейден тітіркеніп кетті. Ол адам да мен секілді 11А орнында отырған екен», — деп жазды. Актер бұл жағдайды мистикалық сәйкестік деп қабылдаған.
Джеймс Руангсактың өзі 1998 жылы 11 желтоқсанда Thai Airways әуе компаниясының Airbus A310−300 ұшағымен апатқа ұшыраған. Ұшақ Таиландтың Сураттхани провинциясындағы каучук плантациясына құлаған. Ол кезде 101 адам қаза тауып, 45 адам жараланған еді. Актер 11А орнында отырып, аман қалған.
Актер әлеуметтік желіде бұл ерекше сәйкестікке таңырқап қана қоймай, Air India ұшағы апатынан қаза тапқандардың жақындарына көңіл айтты.
Үндістанның ішкі істер министрі Амит Шах Ахмадабадтағы ауруханада тірі қалған жолаушыға барып, жағдайын білді. Associated Press агенттігінің мәліметінше, ол — Ұлыбритания азаматы, үнді тектес Вишвашкумар Рамеш.
Оны емдеген дәрігер Дхавал Гамети тірі қалған адамның санасы шатасқанын және көптеген жарақат алғанын, алайда өміріне қауіп төніп тұрмағанын хабарлады. Айтуынша, Рамеш апат кезінде ұшақтан ұшып түсіп, өздігінен жақын маңдағы жедел жәрдем көлігіне жеткен.
Әлеуметтік желі қолданушылары бұл оқиғаны “нағыз керемет”, “Құдайдың араласуы”, “ғажап” деп бағалап, мұндай жағдайлардың сирек кездесетінін жазуда. Бір ғана адамның ірі әуе апатынан тірі қалуы — үлкен қызығушылық туғызып, осы секілді басқа оқиғаларға деген зерттеулерге себеп болуда.
