Студент Бхуми Чаухан Air India әуе компаниясының Лондонға бағытталған рейсімен ұшуы керек болған, алайда ұшаққа үлгермей қалды. Қыз жолда кептеліске тап болып, бар болғаны 10 минутқа кешігіп келді – дәл осы уақыт оның өмірін өзгертіп жіберді, деп хабарлайды ALASH.KZ.
Чаухан Үндістанға демалысқа келген еді. Үйіне AI171 рейсімен қайтпақ болған, бірақ бұл ұшақ апатқа ұшырады.
“Біз жүргізушімізге қатты ренжідік, көңіліміз түсіп, әуежайдан кетіп қалдық… Кейін туроператормен сөйлесіп, билет ақшасын қалай қайтаруға болатынын білмек болдық. Сол сәтте маған біреу қоңырау шалып, ұшақ апатқа ұшырағанын айтты”, – деді Бхуми Чаухан BBC-ге берген сұхбатында.
Бұл оқиға қыз үшін шын мәнінде ғажайыпқа айналды. Ол эконом-класстағы 36G орнында отыруы тиіс еді. Чаухан рейске онлайн тіркеліп қойған, алайда әуежай қызметкерлері оны ұшаққа кіргізбей қойған.
Еске салсақ, Boeing 787 Dreamliner ұшағы 12 маусым күні апатқа ұшырады. Әуе кемесі Үндістанның батысындағы Ахмадабад қаласындағы дәрігерлерге арналған жатақхана ғимаратына құлаған.
Ұшақ бортында 242 адам болған, олардың арасында 13 бала, екі ұшқыш және 10 бортсерік бар. Соңғы деректерге сәйкес, апат салдарынан 310-нан астам адам қаза тапты, оның ішінде жердегі адамдар да бар.
